Un pichon torn ornitologic interessant a Maseras

E encara una passejada a Maseras. Un dimècres aprèp-dinnada plan agradiu, amb de solelh (levat a la fin).

Auca banh
En arribant al prumièr observatòri vesi las aucas que se netejan.

 

Auca de magellan
La plan polida auca de Magellan

Las aucas son plan comunas a Maseras ont nisan e ivèrnan, arriba qu’una autra espècia demòre amb elas, coma la pichona auca marina (Branta leucopsis) o coma çai-sus una auca de Magellan (Chloephaga picta).

Lo banh de la coardèla
Aquí lo banh per òrdre cronologic d’una coardèla jauna, se banhèt dos còps e a cada còp se daissava secar.
Trida gratapalha
Una trida gratapalha que manja dins l’èrba, darrièr a esquèrra i a la feme.
Ribeiròl
Los ribeiròls son de retorn.

Doncas aquí pel prumièr observatòri, vegèri tanben de cambarudas, de sarcèlas, de tirons còlverds e de becassinas.

Un pauc mai de 500 m aprèp, arribèri a un petit estanh amb dos observatòris : i avià dos ragondins, un coble de folcas, de galinas d’aiga e doas charlotinas cendrosas (Limosa limosa).

Barjas
Las doas charlotinas gaireben simetricas
Barja
Una polida charlotina cendrosa.

 

Lo seguent observatòri balha en fàçia del prumièr ; i a una illa ont d’aucas nisan e ont los còrbmarins se repausan.

Cuol blanc
Un cuol blanc d’aiga que se passeja pas plan luènc de l’observatòri.
Gardabuòus
Los garda-buòus arriban sus l’illa.
Gardabuòu que beu
Aprèp un « long » vòl de qualques centenats de mètres un garda-buòu a set.

I aviá tanben un cabusset e de tirons culhèrs.

A las manjadoiras i a un flòc de verdièrs (25-40 individús), mas tanben de melhengas carbonièras e de pinçons.

Pinçona
Una plan polida pinçona.
Verdièr
Un verdièr un pauc calm.
Verdièr agresiu
E un autre que cridava per empachar un tresen de se pausar.

 

Un pauc mai luènc una tirona e sos pichons se passejavan.

Tironet

 

E lo darrièr ausèl de la vesprada : un tiron que s’escacalassa !

Lo comic

%d blogueurs aiment cette page :