Aquila pennata (ancianament Hieraaetus pennatus)

agla cauçadaAgla cauçada o agla patuda semblan los noms mai espandits.
Veire a la fin de la ficha la tièra de noms amb las referéncias.

Òrdre : Falconiformas
Familha : Accipitridats
Angl. : Booted Eagle
Fr. : Aigle botté
It. : Aquila Minore
Esp. : Aquila Calzada
Cat. : Àguila Calçada

Etimologia :
Grèc : hieros (sacrat) aetos (agla)
Latin : pennatus (d’alas pennadas)
Cauçada/calçada, patuda/pautuda, botté : las patas son cobèrtas de plumas e  l’aucèl sembla calçat.

Son nom ven de sas patas fòrça emplumadas. Sembla una gòira negra, mas sa coa es mai longa e cairada.
Se’n pòt veire de doas menas :
– una forma clara : dejós de las alas blanc (remijas negras)
– una forma escura : dejós de las alas fosc amb la coa palla.

La mai pichòta de nòstras aglas, longa de 47cm per una envergadura de 110 a 135 cm. Lo mascle e la femèla se semblan, mas lo mascle es mai pichòt.

Nisa dins los aubres grands, lo parelh ligat per la vida demòra fidèl a son siti de nidificacion. Bastís lo nis de mièg abriu fins a la primièra setmana de mai. La feme coa un ò dos uòus, de còps tres. Aquela mena d’agla tua pas lo cabdet dins lo nis e lo mai sovent sortís dos aglons. Entre la ponduda e l’envòl se passa tres meses. Es la feme qu’abalís los aglons, lo mascle se carga de caçar e de porgir lo manjar. Se noirís d’aucèls, de reptils e de mamifèrs pichons.
Se pòt observar en çò nòstre mas s’en va l’ivèrn en Africa en passar per l’estrech de Gibartar.
Del temps de la migracion, las aglas de França viatjan amb las aglas d’Espanha.

Dins lo temps, los Tartars l’empleguèron per caçar la lebre, lo reinal, l’antilòp e lo lop.

Tièra de noms (veire la bibliografia aicí) :
La russa pautuda (Gard : Crespon)
L’Ègla Pautuda, La Russa Pautuda (Provença : Galtier)
L’Agla Calçat (Lengadòc naut)

Joan-Loís Segondy

Per anar a l’article sus l’agla cauçada, clicatz aicí.

Publicités
%d blogueurs aiment cette page :